نور حِماي الجزء السادس

منذ ذلك اليوم لا يجتمع ملك و محمد إلا و ثالثهما... نور. حتى أنه أصبح يوصل ملك و ينتظرها بالخارج حتى تنتهي من محاضرتها لأنه كان يشك أنها تكذب عليه بشأن مواعيد إنتهائها من المحاضرات... كان الموضوع كالكابوس لمحمد و ملك ولكن نور كان مستمتع بهذا جداً... و ظل هذا الكابوس قائم لمدة 4 شهور.

بعد تلك الفترة في أحد الأيام كان محمد يكلم ملك على الهاتف "ملك أنا في مرة هامسك أخوكي من زمارة رقبته و أروح فيه فأبو زعبل"

ضحكت ملك و قالت "حرام عليك لية بس كدة هو عملك ايه؟؟"

محمد (متعجب من سوأل ملك):"عملي ايه؟؟ لا أبدا معملش حاجة واقفلي زي اللقمة في الزور بس لحد ما هيكتم نفسي و أموت ناقص عمر... يا ملك ده مفيش مرة أقابلك غير لما يكون ناطتلي في النص... ده عيل سخيف"

ملك:"معلش هدئ نفسك بس. هو بس بيعمل كده عشان خايف عليا... و بعدين أنا هاتكلم معاه في الموضوع ده ماشي؟؟"

محمد:"يا ستي أنا مقدر إنه خايف عليكي و كل حاجة بس مش كده أبداً.. و بعدين تكلميه في ايه؟! ما أنتي كل مرة تكلميه في الموضوع ده يقوم يعند أكتر"

ملك:"لأ ماتخفش. المرة دي هاعرف"

محمد:"يا رب... على الله يحس على دمه و يهدأ. عمتاً النهارده إن شاء الله لازم أشوفك و المرة دي لو شفته هاعلقه على عمود النور اللي قدام بيتكوا"

ملك (محاولة كتم ضحكاتها):"هي هي!! لأ خلاص متخفش. قلتلك أنا هاتصرف"...

نادت ملك نور بكل حنية و أدب "نوووور. عايزاك ثانية ممكن"

نور: (بقلق):"يا منجي من المهالك يا رب... مش مرتاح لنبرة الصوت الرقيقة دي شاكلك ناويا على مشكلة"

فضحكت ملك و قالت "هاهاها!! أنت مسخرة والله"

نور(بتعجب):"آآه... لأ دي مش مشكلة دي مصيبة... في ايه يا ملك من غير لف و دوران و إركني القرع المباشر"

ملك:"ماشي... من غير لف ولا دوران أنا عايزة أخرج النهارده مع محمد و لو سمحت ماترشأليش زي كل مرة... بقالك 4 شهور لازقلنا و أظن إنك مشفتش أي حاجة وحشة من محمد صح؟؟!!!"

نور (بهدوء و برود):"فييييييي أحلامك... أصلاً مش بيعمل حاجة عشان أنا ببقي واقفله زي القضاء المستعجل و بالتالي مافيش نزول إلا و رجلي على رجلك"

ملك:"عشان خاطري والنبي يا نور... طب بص المرة دى بس و أعدك لو عمل أي حاجة إن شالله لو قد الفتفوتة عمري ما هاقابله أبداً أبداً ماشي... بللللليييييييييييييييييييييييييز"

نور (ناظرا لأعلى):"اللهم طولك يا روح. صبرني يا ولي الصابرين... ماشي بس ماتظتيش فيها، أخر مرة هاوافق أصلاً"

ملك:"ميرسي يا حبيبي يا أجمل أخ في الدنيا" ثم أعطت ملك لنور قبلة و سريعاً قاطعها نور بسخرية "خلاص خلاص من غير بوس بس عشان بضرس"

ملك (و هي متجهة لغرفتها):"سلام بقى عشان ألحق أجهز. أشوفكوا بليل بقى... آه صحيح يا نور... خف شوية على مدرس العربي عشان قرب يطلع من هدومه و دي أخر سنة... هاه!!! كحكة واحدة في الشهادة مش هايحصل طيب... مجموعك لو قل عن 90% ليلتك هاتبقى طيييييين"

نور (بسخرية):"إنت جاية تعملي فيها سيادة لواء الفضيلة. إنت مش وراكي معاد... يالا من غير مطرود روحي للباشا حبيب القلب و فكك مني بقى"

ملك (و هي تغمز لنور):"ماشي يا لمض باشا. إهرب إهرب من الحوار حظك إني مش فاضية لك... يالا سلام بقي كفاية رغي"

"سلام ياختي ياكش تولعوا في يوم واحد" قال نور هذه العبارة ثم قال بصوت هادئ بينه و بين نفسه "إلهي ياااااااا رب باقي المدرسين يطفشوا هما كمان بلا قرف"

ملك (بصوت عال من غرفتها):"بتقول حاجة يا نور"

قال نور مسرعاً "حبيبة قلبي... مش بقول أي حاجة بكح بس..."

ملك (بسخرية):"سلامتك يا خويا من الكحة"