نور حِماي الجزء الثامن

في تلك الأثناء كان قد وصل نور للبيت و ذهب لشقة شريف حتى يرجع له مفاتيح الدراجة البخارية. ضرب نور الجرس ففتح شريف له قائلاً "نور باشا تكرم و تعطف و رجع... كل ده واخد الموتوسكل"

نور (بهدوء و حزن):"خلاص يا عم. أديني رجعتهولك و فوقيه بوسة"

شريف:"بوسة ايه يا عم؟! هو أنا خد حاجة انت هتتبلى عليه... ايدك على الإيجار"

نور (بإنفعال):"ماتتهد بقى يا شريف.. هو أنا ناقصك يا أخي"

شريف (بجدية):"في ايه يا نور؟! ايه اللي حصل"

نور:"مفيش حاجة يا شريف. أنا أسف إني إتنرفزت عليك... أنا طالع أجيبلك الفلوس"

شريف:"فلوس ايه دلوقتي والله مانت ماشي من هنا قبل ماتقول لي في ايه... ما أنا مش هاسيبك كده...تعالى ندخل و قول لي مالك"

بعد قليل كان نور قد حكى لشريف ما حدث معه اليوم... قصة الطفلة التائهة و كيف رأى أمها كما لو كانت أخته هدى.

شريف:"يااااااه! كل ده جواك... ده أنا أول مرة أعرف إن كان ليك أخت تانية غير ملك"

نور:"و أي أخت يا شريف... دي كانت ملاك... من ساعة ما ماتت و الدنيا بقيت رمادي... و بقيت بكره الدنيا بالناس اللي فيها"

شريف:"أنا معاك إن لما حد عزيز عليك الدنيا بتسود... بس ده قدر كل واحد فينا... كلنا هنموت"

نور:"ليك حق تقول كده... أصلك ماتعرفش هي ماتت إزاي"

شريف:"ماتت إزاي؟! عايز أعرف لو ده مايضايقكش"

نور:"بعدين بقى... لازم أمشي دلوقتي الوقت إتأخر... سلام عليكم".

بعدما إنتهت السهرة الرائعة، عادت ملك لبيتها و هي سعيدة و طائرة من الفرح. بعد ذلك نظرت لغرفة نور ووجدت ظوء في الغرفة فعرفت أن نور مازال مستيقظاً. فدخلت غرفته و وجدته سارحاً لم يشعر حتى بوجود ملك في غرفته. فقالت له ملك و علامات الفرح على وجهها "اللي واخد العقل ميييين؟؟!!!"

نور (بإبتسامة خفيفة محاولاً إخفاء حزنه لتذكره أخته هدى):"أهلاً أهلاً! القمر جاي منشكح كده ليه؟؟!!!"

ملك (و هي تنظر جيداً لعينان نور و يبدو أنها لاحظت أن في وجهه أثاراً لدموع)"فيه أيه يا نور؟؟!!! هو فيه حاجة حصلت النهار ده؟!"

نور:"هيحصل أيه مثلاً؟ واحد قاعد مرزوع في البيت طول اليوم أيه اللي ممكن يضايقه مثلاً؟"

ملك:"يا أبو النصب بلاش تحوير عليه بس والنبي... عشان أنا عارفة كويس أوي إن... سيادتك كنت بتراقبني و ماشي ورايا النهار ده؟!"

نور:"يا إحراج السنين... و عرفتي منين يا كورمبو إني كنت وراكي و براقبك؟!"

ملك (مشاورة على رأس نور):"ببساطة إحنا مش عشِرة يومين... دي عشِرة 17 سنة... يعني أفهم و أعرف كويس أوي أيه اللي بيدور في الدماغ المنيلة بستوميت نيلة دي"

نور (بهدوء):"أسف لكون دماغي دماغ منيلة بستوميت نيلة... بس الدماغ دي مابقيتش كدة من فراغ ولا أيه؟؟!!!"

ملك (و هي تربت على كتف نور):"سلاااااااااام عشان أنا مش ناوية أتنكد أنا أصلاً جاية فرحانة"

نور (ممسكاً يدها حتى لا تذهب):"إستني إستني... ماتكروتنيش. مش هنكد عليكي ولا حاجة بس مانتيش ماشية إلا لما تحكيلي اللي حصل أنا كنت براقبك آه بس ماتبعتش السهرة كلها فهتحكيلي كل حاجة بالتفصيل"

"بعدين يا سيادة المفتش أنا هاموت و أنام" قالت ملك و هي تشد خده كأنها تدلل طفل "كفاية رغي بقى بالخدود العجيبة دي"

"بتتريقي على خدودي يا جزمة.. على الأقل أرحم من وشك المقفع دة... دة أنا مفيش زي حلاتي يا بنتي..."

"طيب طيب ماشي بون نوي بقى عشان عايزة أتخمد... أوف"

نور (بسخرية محاولاً كتم ضحكاته):"بون نوي؟؟!!! الله يرحم جدو مات من العطش في الغربة عشان ماعرفش يقول ووتر"

ملك (مسرعة)"يخربييييت أبو ده لسان طويل... أية اللطافة دي يا..."

نور (مقاطعاً كلامها):"خلاص ياختي مش كنتي عايزة تنامي روووحي يالا إتخمدي"

ملك (بصوت خافض):"أعوذ بالله.. طيب طيب أنا بس مش عايزة أزعق عشان ماما نايمة بس... سلام"

نور (بسخرية):"سلام ياختي".