بلد فيها ناس كتيرة في سباق مصالح
و كل واحد يعمل أي حاجة لو له صالح
يلعبوا بالغلابة و المحتاجين لأهدافهم
و يكسبوا الغلابة في صالح أطماعهم
بس البلد خابزة و عاجنة كل من كان فدائي
و عارفة كويس من بيشقى لها و يقولها "فداكي"
بس دول قلة قليلة من الناس مستخبية
ده غير اللي اتقتل واللي أحلامه منتهية
ناس عايشة لوطنها و تهتف بلادي بلادي
و ناس عايشة لشهوتها و تقول ذاتي ذاتي
اللي يهتف ضد الإرهاب واللي يهتف ضد الإرشاد
واللي يقولك أصلهم ضروا البلاد و بيدبحوا في العباد
و اللي يقولك لا للجيش و لا للشرطة و لا للإخوان
و محدش فاهم إن كل فئة لها الأمين ولها اللي خان
و ناس تانية مغيبة تمشي ورا اللي يتكلم بأسم الدين
مش مهم تقتل، تدبح، تدمر. المهم يبقي في سبيل الدين
مش فاهمين إن اللي بيعملوه ده ضد الدين و الإنسانية
طظ في اللي بيدعي و يقتل في سبيل الدين أو العلمانية
فضلتوا تقولوا وتهتفوا إحنا مع فلان و إحنا ضد علان
ونسيتوا إن هدفنا نحمي بلدنا من فوضى والإهمال
قولوا عليا فلول، علمانية، إخوانية، ثورجية
بس أنا مش ههتف وأقول غير إني مصرية
يا ريت نفوق بقى و نصحصح لبعض
و منبقاش حتى في النقاش بنعادي بعض
بدل مانمشي بمبدأ الخلاف في الرأي لايفسد للود قضية
مشينا بمبدأ الخلاف في الرأي يقتل في أنفسنا الإنسانية
-ساكنة الأحلام
No comments:
Post a Comment